އީޔޫގެ ހިލޭ އެހީ ގިނައިން ދިނީ ހުޅުމާލެ ގެސްޓްހައުސްތަކަށް

ކޮވިޑް-19 އާ ގުޅިގެން ރާއްޖޭގެ އިގްތިސޯދުގައި އެންމެ ހާލު ބޮޑުވީ މާލެއާ ދުރުގެ ވިޔަފާރިތަކެވެ. ހާއްސަކޮށް ގިނަ އަދަދެއްގެ އާއްމުން ހިއްސާވާ ގެސްޓްހައުސް ވިޔަފާރިއަށެވެ. އެހެންވެ އެ ސިނާއަތަށް އެހީވާން ޔޫރަޕިއަން ޔޫނިއަން (އީޔޫ) އިން މިދިޔަ ސަރުކާރަށް ދެ މިލިއަން ޔޫރޯ ދިނެވެ. މިއީ ހިލޭ ބަހަން ދިން ފައިސާ އެކެވެ. މި ފައިސާ ސަރުކާރުން ބަހަން ނިންމީ ކޮވިޑް-19 އަށްފަހު އެންމެ ބޮޑަށް ބޭނުން ޖެހިފައި އޮތް ޓޫރިޒަމްގެ ކުދިމެދުފަންތީގެ ވިޔަފާރިތަކަށެވެ. 

މި ފަންޑު ބަހަން ސަރުކާރުން އޭރު ހަވާލުކުރީ އިކޮނޮމިކް މިނިސްޓްރީން ގޮތް ކިޔާ ސަރުކާރު ކުންފުނި މޯލްޑިވްސް ފަންޑު މެނޭޖުމަންޓް ކޯޕަރޭޝަން (އެމްއެފްއެމްސީ) އަށެވެ. "އީޔޫ ސަޕޯޓް ފޯ އަ ރެޒީލިއަންޓް ރިކަވަރީ އޮފް އެސްއެމްއީ ޓޫރިޒަމް އިންޑަސްޓްރީ އިން ދަ މޯލްޑިވްސް" ގެ ނަމުގައި މި ފަންޑު ލިބިފައި ވަނީ 2021 ވަނަ އަހަރު އެވެ. ނަމަވެސް މި ފަންޑުގެ ފައިސާ ކުދިމެދުފަންތީގެ ވިޔަފާރިތަކަށް ދީފައިވަނީ 2022 އަހަރު އެވެ. 

ސަރުކާރުގެ ރަސްމީ އިދާރާގެ އޮނިގަނޑުގެ ތެރޭން "މި" ނޫހަށް ލިބިފައިވާ މި ލިޔުންތައް ދައްކާ ގޮތުގައި އީޔޫގެ މި ހިލޭ އެހީ އެންމެ ގިނައިން ލިބިފައި ވަނީ ކޮވިޑް-19 ގެ ސަބަބުން އެންމެ އަވަހަށް ރިކަވާވި އަދި އެންމެ ގިނަ ކަރަންޓީން ޓޫރިސްޓުންގެ ސަބަބުން ގެއްލުމުން އަވަހަށް އަރައިގަތް މާލެ ސަރަހައްދުގެ ގެސްޓްހައުސް ތަކަށެވެ. 

ބެހީ ކިހާ ވަރެއް ؟ ޔޫރަޕިއަން ޔޫނިއަންގެ އީޔޫ ސަޕޯޓް ފޯ އަ ރެޒީލިއަންޓް ރިކަވަރީ އޮފް އެސްއެމްއީ ޓޫރިޒަމް އިންޑަސްޓްރީ އިން ދަމޯލްޑިވްސް މި ފަންޑުގެ ދަށުން 32.5 މިލިއަން ރުފިޔާ ލިބިފައިވެ އެވެ. މި ފައިސާގެ ތެރޭން ގެސްޓްހައުސްތަކާއި ސަފާރީތަކަށް 25 މިލިއަން ރުފިޔާ ދީފައިވެ އެވެ. މި އެހީ 65 ސަފާރީއަކާއި 341 ގެސްޓްހައުސްއަކަށް ލިބުނު ކަމަށް ދައްކަ އެވެ.