ރައީސް ވިދާޅުވީ ދެވަނަ ފިޔަވައްސާ އެކު މަގު ހެދުމުގެ މަަސައްކަތް ނިންމާ ނުލާނެ ކަމަށެވެ. އަދި ވިދާޅުވީ މި ފަސް އަހަރުތެރޭ ހުރިހާ ސިޓީއެއްގެ ހުރިހާ މަގެއް ހަދާނެ ކަމަށެވެ.
ހުރިހާ ސިޓީތަކުގެ ހުރިހާ މަގުތަކެއް މި ވެރިކަމުގެ ފަސް އަހަރުތެރޭ ޒަމާނީ ފެންވަރަށް ތަރައްގީ ކުރާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސުލްޖުމްހޫރިއްޔާ މިހެން ވިދާޅުވީ ފުވައްމުލަކު ސިޓީގެ ރައްޔިތުންނާއި ބައްދަލު ކުރައްވާ މިރޭ ވާހަކަފުޅު ދައްކަވަމުންނެވެ. ފުވައްމުލަކު ސިޓީގެ މަގު ހެދުމުގެ ދެވަނަ ފިޔަވަހީގެ މަސައްކަތުގެ ދަށުން 50 މަގެއް ހެދުމުގެ މަސައްކަތް މިއަދު ފަށާފައިވާ ކަން ފާހަގަ ކުރައްވާ ރައީސް ވިދާޅުވީ ދެވަނަ ފިޔަވައްސާ އެކު މަގު ހެދުމުގެ މަަސައްކަތް ނިންމާ ނުލާނެ ކަމަށެވެ. އަދި ވިދާޅުވީ މި ފަސް އަހަރުތެރޭ ހުރިހާ ސިޓީއެއްގެ ހުރިހާ މަގެއް ހަދާނެ ކަމަށެވެ.
މީގެ އިތުރުން ރައީސް ވިދާޅުވީ ދެން ހުރި ހުރިހާ ރަށެއްގެ މައި މަގުތައް ހަދާނެ ކަމަށެވެ. އެ މަސައްކަތް ފެށުމަށް ކުރަން ޖެހޭ މަސައްކަތްތައް ވަރަށް އަވަހަށް ފަށާނެ ކަމަށާ އެ މަސައްކަތް ކުރާނެ ގޮތްތައް ރާވަމުންދާ ކަމަށެވެ. ރައީސް ވިދާޅުވީ މަގުތައް ހެދުމަށް އެވަރުގެ ސަމާލު ކަމެއް ދެއްވަނީ އެކަމުން ފަރުދީ ދިރިއުޅުމަށް ފަސޭހަވެ ތަރައްގީއާ ކުރިއެރުން ލިބޭ ކަމަކަށް އެކަން ވެގެން ދާނެތީ ކަމަށެވެ.
މީގެ އިތުރުން ރައީސް ވަނީ ފުވައްމުލަކު ސިޓީއަށް ކޮށްދޭން ނިންމާފައިވާ މުހިންމު ވަރަށް ގިނަ މަސައްކަތްތަކުގެ ތަފްސީލް ދެއްވާފައެވެ.
ފުވައްމުލަކު ސިޓީގެ މަގު ހެދުމުގެ ދެވަނަ ފިޔަވަހީގެ މަސައްކަތް މިއަދު ވަނީ ފަށާފައެވެ. އެ މަސައްކަތް ފައްޓަވައި ދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ. ފުވައްމުލަކު ސިޓީގެ މަގު ހެދުމުގެ ދެވަނަ ފިޔަވަހީގެ ދަށުން ޖުމްލަ 50 މަގެއް ޒަމާނީ ފެންވަރަށް ހަދާ ތާރު އަޅާނެ އެވެ.
އެއީ 12.7 ކިލޯ މީޓަރުގެ ސަރަހައްދެކެވެ.
އެ މަަސައްކަތް ކުރާނީ އެމްޓީސީސީ އިންނެވެ. އެ މަސައްކަތް އެމްޓީސީސީއާ ހަވާލުކޮށްފައި ވަނީ 255.2 މިލިއަން ރުފިޔާ އަށެވެ.
މަސައްކަތް ފަށާތާ ދެ އަހަރުގެ ތެރޭގައި 50 މަގުގެ މަސައްކަތް މުޅީން ނިންމަން ޖެހެ އެވެ.
ފުވައްމުލަކު ސިޓީގެ މަގު ހެދުމުގެ މަސައްކަތް ފެށީ 2020 ވަނަ އަހަރު އެވެ. އެ މަސައްކަތުގެ ދަށުން ފުވައްމުލަކު ސިޓީގެ ގިނަ މަގުތަކުގައި ވަނީ ތާރު އަޅާ ޒަމާނީ ފެންވަރަށް ހަދާފައެވެ. ޖުމްލަ 31 މަގެއް ގައި ތާރު އަޅާ ވަނީ ނިންމާފައެވެ.