ހިސާބުން ހެޔޮ ފާހަގައެއް | ދިމަދިމާއިން ހަރަދު ކުޑަކުރި މަންޒަރު

ދިވެހި ދައުލަތަށް ކުރިމަތިވެފައިވާ މައްސަލައަކީ އާމްދަނީ ނުލިބުމެއް ނޫނެވެ. ލިބޭ އާމްދަނީއަށްވުރެ ހަރަދު ބޮޑު ވުމެވެ. ފިނޭންސުން ނެރޭ "ވީކްލީ ފިސްކަލް" ނުވަތަ ހަފުތާގެ މާލީ ހިސާބުން އަބަދުމެ ފެންނަނީ ވެސް އެ މަންޒަރެވެ. އެކަމަކު އާ ބެޖެޓާއެކު ހަރަދުގެ ބައި ބޮޑުތަނުން ދައްވަމުންދާތަން އެބަ ފެނެ އެވެ. 

ހަފުތާ ހިސާބުން ފެންނަނީ ހަރަދު ކުރުން މަދުކޮށްފައި ވާތަނެވެ. ހަރަދު ކުރުން މަދުވެފައިވާ ކޮން ދާއިރާތަކެއް އެބަހުއްޓެވެ. މި ފެންނަނީ ބަދަލެކެވެ.

ފިނޭންސުގެ ވީކްލީ ފިސްކަލް ރިޕޯޓު ދައްކާ ގޮތުގައި މި އަހަރު ހަރަދު ކުރަން ދީފައިވާ 49,8 ބިލިއަން ރުފިޔާގެ ބަޖެޓުން މިހާތަނަށް ހަރަދު ކޮށްފައި ވަނީ 3,9 ބިލިއަން ރުފިޔާ އެވެ. އެކަމަކު މިދިޔަ އަހަރުގެ މި މުއްދަތުގައި ދައުލަތުގެ ހަރަދު ހުރީ 5,8 ބިލިއަން ރުފިޔާގަ އެވެ. 

މިގޮތުން މިދިޔަ އަހަރު ރިކަރަންޓު ހަރަދު 3.4 ބިލިއަން ރުފިޔާގަ ހުރި ނަމަވެސް މި އަހަރު މި އަދަދު ވަނީ 2.6 ބިލިއަން ރުފިޔާއަށް ތިރި ކޮށްފަ އެވެ. ރިކަރަންޓު ހަރަދުގެ ބައިން މަތިވެފައި ވަނީ މުސާރަ އާއި ޕެންޝަން އަދި އިނާތްތަކުގެ ހަރަދުތަކެވެ. މިބަޔަށް މި އަހަރު އެއް ބިލިއަން ހަރަދު ކޮށްފައިވާއިރު މިދިޔަ އަހަރު މި އަދަދު ހުރީ 956.7 މިލިއަން ރުފިޔާގަ އެވެ. 

މީގެ މައިގަނޑު ސަބަބަކީ މިދިޔަ ރިޔާސީ އިންތިހާބުގެ ކެމްޕޭނަށް މުޅި ސަރުކާރުގެ މުވައްޒަފުންގެ މުސާރަތައް މަތި ކޮށްފައި ވުމެވެ. 

މިދިޔަ އަހަރުގެ ލޯނު ހަރަދު ހުރީ 446.4 މިލިއަންގަ އެވެ. މި އަހަރުގެ މިހާތަނަށް ފަހަށް ރައްކާކުރާ ފަންޑަށް 102.1 މިލިއަން ރުފިޔާ ވަނީ ޖަމާކޮށްފަ އެވެ. 

ހިސާބުތަކުން ދައްކާ ގޮތުގައި ހަރަދު ކުޑަ ކުރަމުންދާއިރު ދައުލަތުގެ އާމްދަނީ ވަނީ މަތިވަން ފަށާފަ އެވެ. މިހާތަނަށް ޖުމްލަ ހަރަދުގެ ގޮތުގައި 3,457.0 ބިލިއަން ހޭދަ ކޮށްފައިވާއިރު، އާމްދަނީއަށް 4,171.7 ބިލިއަން ރުފިޔާ ވަނީ ލިބިފަ އެވެ. މި އަހަރު ޓެކުހުގެ އާމްދަނީއަށް 3,7 ބިލިއަން ރުފިޔާ ލިބިފައިވެ އެވެ. އަދި ޓެކްސް ނޫން ގޮތްގޮތުން 427.7 މިލިއަން ލިބިފައިވެ އެވެ. އަދި ހިލޭ އެހީއަށް 9.9 މިލިއަން ލިބިފައިވާ ކަމަށް ދައްކަ އެވެ.