އެމްޑީޕީގެ ރައީސް ކަމަށް ޝާހިދު ނޫން ބޭފުޅަކު ކުރިމަތިލާނެ ކަމަކަށް ނުބެލެވެ އެވެ. އެހެން ބޭފުޅަކު އަދި ޝައުގުވެރިކަން ފާޅު ކުރައްވާފައެއް ނުވެ އެވެ.
އެމްޑީޕީގެ ރައީސް ކަމަށް ވާދަ ކުރައްވާނެކަން ކުރީގެ ފޮރިން މިނިސްޓަރު އަބްދުﷲ ޝާހިދު އިއުލާނު ކުރައްވައިފި އެވެ.
އެމްޑީޕީގެ ރައީސް ކަަމަށް އޮތީ ހުޅުވާލާފައެވެ. އަންގާރަ ދުވަހުގެ ނިޔަލަށް އެ ފުރުސަތު ހުޅުވާލާ މާޗް މަހުގެ ދެވަނަ ދުވަހު އިންތިހާބު ބޭއްވުމަށް އެމްޑީޕީން ވަނީ ނިންމާފައެވެ.
ރައީސް ސޯލިހްގެ ސަރުކާރުގައި ފޮރިން މިނިސްޓަރު ކަން ކުރެއްވި އަދި ރައީސް މައުމޫންގެ ވެރިކަމުގައި ވެސް އިސް މަގާމުތަކެއް ފުރުއްވާފައިވާ މިނިސްޓަރު ޝާހިދު ވަނީ އެމްޑީޕީގެ ރައީސް ކަމަށް ވާދަ ކުރައްވާނެކަން ދެންމެ އިއުލާނު ކުރައްވާފައެވެ.
"އައު ފޯރިޔަކާއި އައު ޖޯޝަކާއި އެކު އާބާރެއް ގައި އެމްޑީޕީ ނިކުމެ ރައްޔިތުން އެދޭ މިސްރާބަށް ރާއްޖެ އަލުން ގެންދިޔުމަށް އެންމެން އެކުވެ އަތުގުޅާލަން ވެއްޖެ ކަން ބަލާލި ކޮންމެ ދިމާލަކުން މިއަދު މިއޮތީ ފެންނާށެވެ،" އެމްޑީޕީގެ މެންބަރުންގެ ތާއީދަށް އެދިވަޑައިގެން ޝާހިދު ކުރެެއްވި ޕޯސްޓް ގައި ވިދާޅުވި އެވެ.
ޝާހިދުގެ ސްލޯގަން އަކީ "އާބާރެއް" ސްލޯގަން އެވެ.
އެމްޑީޕީގެ ރައީސްގެ މަގާމުގައި ވަގުތީ ގޮތުން މިވަގުތު ހުންނެވީ ކުރީގެ ރައީސް އިބްރާހިމް މުހައްމަދު ސޯލިހެވެ. އެމަނިކުފާނު އެ މަގާމަށް ހަމަޖެއްސެވީ ނޮވެންބަރު 24 ގައި އެމްޑީޕީން ބޭއްވި ގައުމީ މަޖިލީހުގެ ޖަލްސާ ގައެވެ. އެމްޑީޕީގެ ރައީސްގެ މަގާމު އޭރު ހުސްވީ ކުރީން އެ މަގާމުގައި ހުންނެވި ކުރީގެ ރައީސް މުހައްމަދު ނަޝީދު އެމްޑީޕީގެ ރައީސް ކަމުންނާއި މެންބަރު ކަމުން ވެސް އިސްތިއުފާ ދެއްވުމުންނެވެ.
އެމްޑީޕީގެ ރައީސް ކަމަށް ޝާހިދު ނޫން ބޭފުޅަކު ކުރިމަތިލާނެ ކަމަކަށް ނުބެލެވެ އެވެ. އެހެން ބޭފުޅަކު އަދި ޝައުގުވެރިކަން ފާޅު ކުރައްވާފައެއް ނުވެ އެވެ.