ގަވައިދާ ހިލާފަށް ބަހައްޓާފައި ހުރި އުޅަނދުތައް ނަގަން ފަށައިފި

މާލެ އަދި ހުޅުމާލޭ މަގުތަކުގައި ގަވާއިދާ ހިލާފަށް ބަހައްޓާފައި ހުރި އުޅަނދުތައް ނަގައި، ނައްތާލުމުގެ ޕްރޮގްރާމެއް މިއަދު ފަށައިފި އެވެ.

ޓްރާންސްޕޯޓް މިނިސްޓްރީން މި ޕްރޮގްރާމް ހިންގަނީ މާލެ ސިޓީ ކައުންސިލް، ހައުސިން ޑިވެލޮޕްމެންޓް ކޯޕަރޭޝަން (ޢެޗްޑީސީ)، ވެމްކޯ އަދި ފުލުހުންނާ ގުޅިގެންނެވެ.

ސިޓީ ކައުންސިލުން ބުނީ، މި ޕްރޮގްރާމް ހިންގުމުގެ ބޭނުމަކީ އެއްގަމު އުޅަނދު ތޮއްޖެހުމުގެ ސަބަބުން މާލެ ސަރަހައްދުގެ ޓްރެފިކް ފްލޯއަށް ދިމާވެފައިވާ މައްސަލަތަކަށް ހައްލު ހޯދުމަށް ކަމަށެވެ.

އެހެންކަމުން ޓްރެފިކް ތޮއްޖެހޭ މައްސަލައަށް ހައްލު ހޯދަން ފަށާފައިވާ މަސައްކަތްތަކުގެ ތެރެއިން، ބޭނުންނުކޮށް ގަވާއިދާ ހިލާފަށް މާލެ އަދި ހުޅުމާލޭގެ މަގުތަކުގައި ގިނަ ދުވަހު ބަހައްޓާފައި ހުރި އުޅަނދުތައް ދެނެގަނެ، ހަމަޖެހިފައިވާ އުސޫލުގެ ތެރެއިން އެ އުޅަނދުތައް މަގުމަތިން ނެގުމަށްފަހު ނައްތާލުމުގެ މަސައްކަތް މި ޕްރޮގްރާމުގެ ތެރެއިން ކުރަމުންދާނެ ކަމަށެވެ.

މި މަސައްކަތް ފެށުމުގެ ގޮތުން މިއަދު ވަނީ ހާއްސަ ރަސްމިއްޔާތެއް ވެސް ބާއްވާފަ އެވެ. މި ރަސްމިއްޔާތުގައި މާލޭގެ މޭޔަރު އާދަމް އާޒިމްގެ އިތުރުން ހޯމް މިނިސްޓަރު އަލީ އިހްސާން ވަނީ ބައިވެރިވެ ވަޑައިގެންފަ އެވެ.

މިއަދުން ފެށިގެން މަގުމަތީގައި ނުގަވާއިދުން ބަހައްޓާފައިވާ އުޅަނދުތަކާއި، ބޭނުން ނުކޮށް ގިނަ ދުވަސް ވާންދެން ބަހައްޓަފައި ހުރި އުޅަނދުތައް ޓޯ ކުރުމަށްފަހު ނައްތާލުމުގެ މަސައްކަތް ކުރާނެ އެވެ. ޓޯ ކުރުމަށް ބޭނުންވާ އުޅަނދުތައް ވެސް މިއަދު ވަނީ މާލެ ގެނެސްފަ އެވެ.