އެމްއާރްއެމް އުވާލަން ނިންމީ ގާނޫނާ ހިލާފަށް ކަމަށް ކަނޑައަޅައިފި
ސިވިލް ކޯޓުން މިއަދު ވަނީ މައްސަލަ ނިންމާ ހުކުމްކޮށްފައެވެ. ހުކުމް ގައި ބުނީ އެމްއާރުއެމް އުވާލުމަށް އިލެކްޝަންސް ކޮމިޝަނުން ނިންމީ ގާނޫނާ ހިލާފަށް ކަމަށެވެ.
މޯލްޑިވްސް ރިފޯމް މޫވްމަންޓް (އެމްއާރްއެމް) އުވާލަން އިލެކްޝަންސް ކޮމިޝަނުން ނިންމީ ގާނޫނާއި ހިލާފަށް ކަމަށް ސިވިލް ކޯޓުން ނިންމައިފި އެވެ.
އެމްއާރްއެމްގައި، ސިޔާސީ ޕާޓީއެއް ވުޖޫގައި އޮތުމަށް ގާނޫނު ލާޒިމު ކުރާ 3،000 މެންބަރުން ނެތް ކަމަށް ކަނޑައަޅާ އެ ޕާޓީ އުވާލަން އިލެކްޝަންސް ކޮމިޝަނުން ނިންމީ މިދިޔަ އަހަރުގެ މެއި މަހުގެ ތެރޭގައެވެ.
އެ ޕާޓީން ބުނާ ގޮތުން އިލެކްޝަންސް ކޮމިޝަންގެ ނިންމުން ގާނޫނާއި ހިލާފެވެ. އެހެން ކަމުން އެ މައްސަލަ މުރާޖައާ ކޮށްދޭން އެދުނެވެ. ނަމަވެސް ކޮމިޝަނުން ވަނީ ނިންމުމާމެދު ހިތްހަމަނުޖެހޭ ނަމަ ޝަރުއީ މަރުހަލާ އަށް ދިއުމަށް އެދިފައެވެ.
އެހެން ކަމުން އެމްއާރްއެމް އިން ވަނީ އެ ޕާޓީ އުވާލުމަށް ކުރަމުންދާ މަސައްކަތް ހުއްޓާލުމަށް އަންގާ ވަގުތީ އަމުރެއް ނެރެ ދިނުމަށާއި ކޮމިޝަންގެ ނިންމުން ގާނޫނާއި ހިލާފު ކަމަށް ކަނޑައަޅައިދޭން އެދި މައްސަލަ ހުށައަޅާފައެވެ.
އެއާއެކު އެމްއާރްއެމް އުވާލަން އިލެކްޝަންސް ކޮމިޝަނުން ނިންމި ނިންމުމަށް އަމަލު ކުރުން މަޑުޖައްސާލަން އަންގާ ސިވިލް ކޯޓުން ވަނީ އަމުރެއް ނެރެފައެވެ. އެއީ މެއި 28، 2023 ގައެވެ.
އަދި ސިވިލް ކޯޓުން މިއަދު ވަނީ އެ މައްސަލަ ނިންމާ ހުކުމްކޮށްފައެވެ. ހުކުމް ގައި ބުނީ އެމްއާރުއެމް އުވާލުމަށް އިލެކްޝަންސް ކޮމިޝަނުން ނިންމީ ގާނޫނާ ހިލާފަށް ކަމަށެވެ.
ކޮމެންޓް
Republic of Maldives