ޣުއްރާ އަކީ މިނިވަނެއްގެ ދިޔައިގެ 10 ބައިކުޅަ އެއްބައިގެ ދެބައިކުޅަ އެއްބަ އެވެ. އެއީ ޖަމަލުން ނަމަ ފަސް ޖަމަލެވެ. ދީނާރުން ނަމަ 50 ދީނާރެވެ. އެއީ ހާލިސް ރަނުގެ 212.5 ގްރާމެވެ. ދިރުހަމުން ނަމަ 500 ދިރުހަމެވެ.
ޑޮކްޓަރެއްގެ ފަރުވާ ކުޑަ ކަމުން ނުވަތަ އެހެން މީހަކު ކުރި އަމަލެއްގެ ސަބަބުން މާބަނޑު އަންހެނެއްގެ ބަނޑުގައިވާ ދަރިފުޅު މަރުވެއްޖެނަމަ އިސްލާމީ ޝަރީއަތުގައި އޮންނަ ހުކުމް ފަތުވާ މަޖިލީހުން ހަނދާންކޮށްދީފި އެވެ.
މާޗް 12، 2014 ގައި ފަތުވާދޭ އެންމެ މަތީ މަޖިލީހުން ނެރެފައިވާ "މާބަނޑު އަންހެނާގެ ބަނޑުގައިވާ ދަރިއާ ބެހޭ" ފަތުވާ މިއަދު އަނެއްކާ ވެސް އެ މަޖިލީހުން ވަނީ ނެރެފަ އެވެ.
އެ ފަތުވާގައި ބަޔާންކޮށްފައި ވަނީ، ޑޮކްޓަރެއް ނުވަތަ އެހެން މީހަކު ކުރި އަމަލެއްގެ ސަބަބުން މާބަނޑު އަންހެން މީހާގެ ދަރިފުޅު މަރުވެއްޖެނަމަ އިސްލާމީ ޝަރީއަތުގައި އޮންނަ ހުކުމަކީ، އެކަން ކުރި މީހަކު ކުއްޖާގެ ވާރުތަ ވެރިންނަށް ޣުއްރާއެއްގެ މިންވަރު ދިޔައިގެ ގޮތުގައި ދިނުމާއި ކައްފާރާ ދިނުމެވެ.
ޣުއްރާ އަކީ މިނިވަނެއްގެ ދިޔައިގެ 10 ބައިކުޅަ އެއްބައިގެ ދެބައިކުޅަ އެއްބަ އެވެ. އެއީ ޖަމަލުން ނަމަ ފަސް ޖަމަލެވެ. ދީނާރުން ނަމަ 50 ދީނާރެވެ. އެއީ ހާލިސް ރަނުގެ 212.5 ގްރާމެވެ. ދިރުހަމުން ނަމަ 500 ދިރުހަމެވެ.
"މިއީ ކީރިތި ރަސޫލާގެ އަމަލުފުޅުންނާއި ބަސްފުޅުންނާއި ނިޔާފުޅުން ސާބިތުވާ ގޮތެވެ. ކައްފާރާއަކީ މުއުމިން އަޅަކު މިނިވަން ކުރުމެވެ. މިނިވަންކުރާނޭ މުއުމިން އަޅަކު ނުލިބިއްޖެނަމަ، ވިދިވިދިގެން ހަނދުމަހުން ދެ މަސް ދުވަހު ރޯދަ ހިފުމެވެ. މި ހުކުމް ސާބިތުވަނީ ކީރިތި ގުރުއާނުގެ އައްނިސާ ސޫރަތުގެ 92 ވަނަ އާޔަތުންނެވެ." އެ ފަތުވާގައި ބަޔާންކޮށްފައިވެ އެވެ.