ދެ މަސް | ލޯނުތަކަށް 373.6 މިލިއަން ރުފިޔާ ދައްކައިފި

ވޭތުވެދިޔަ ދެ މަސްތެރޭ ސަރުކަރުން ލޯނުތަކަށް 373.6 މިލިއަން ރުފިޔާ ދައްކައިފި އެވެ. 

ފިނޭންސުން ނެރޭ ހަފުތާގެ މާލީ ހިސާބުތައް ދައްކާ ގޮތުން ދެ މަސްތެރޭ މި އަހަރުގެ މިހާތަނަށް ލޯނުތަކަށް 373.6 މިލިއަން ރުފިޔާ ދައްކާފައިވާއިރު، މިދިޔަ އަހަރު މި އަދަދު ހުރީ 367.1 މިލިއަން ރުފިޔާގަ އެވެ. 

މި އަހަރު ސަރުކާރުން ވަނީ ލޯނުތަކަށް 2,202.4 ބިލިއަން ރުފިޔާ ދައްކަން ބަޖެޓުކޮށްފަ އެވެ. 

ލޯނުތަކަށް އިތުރުވީ ކިހާ ވަރެއް ؟ ފިނޭންސުން އާއްމުކުރި މިދިޔަ އަހަރުގެ ތިންވަނަ ކުއާޓަރުގެ ދަރަނި ގްރާފް ދައްކާ ގޮތުގައި މި އަހަރުގެ ފުރަތަމަ ކުއާޓަރާއި ދެވަނަ ކުއާޓަރާ ދެމެދު ހަތަރު ބިލިއަންގެ ދަރަނި އިތުރުކޮށްފައިވެ އެވެ. އަދި ދެވަނަ ކުއާޓަރާއި ތިންވަނަ ކުއާޓަރާ ގައި ދެ ބިލިއަން ރުފިޔާގެ ދަރަންޏެއް ޖުމްލަކޮށް އިތުރުކޮށްފައިވާ ކަމަށް ދައްކަ އެވެ. 

ފިނޭންސުގެ ރިޕޯޓް ދައްކާ ގޮތުގައި ރާއްޖޭގެ އެތެރޭގެ ދަރަނި ވެސް ވަނީ މަތިވެ ހައްދުން ނައްޓާލާފަ އެވެ. އަދި ބޭރުގެ ދަރަނި ވެސް ވަނީ ބޮޑުތަނުން މަތިވެގެން ގޮސްފަ އެވެ

މިދިޔަ ފެށުނުއިރު ރާއްޖޭގެ ބޭރުގެ ދަރަނި ހުރިކަމަށް ދައްކަނީ 47 ބިލިއަން ރުފިޔާގަ އެވެ. ނަމަވެސް މިހާރު މި އަދަދު ވަނީ 51 ބިލިއަން ރުފިޔާ އަށް އިތުރުވެފަ އެވެ. ބޭރުގެ ދަރަންޏަށް މިދިޔަ އަހަރުގެ ތިން ކުއާޓަރަށް ބަލާނަމަ އެވްރެޖުކޮށް ތިން ބިލިއަން ރުފިޔާ ވަނީ އިތުރުކޮށްފަ އެވެ. އެތެރޭގެ ދަރަންޏަށް ވެސް އެއްރެޖުކޮށް ތިން ބިލިއަން ރުފިޔާ އަށްވުރެ ބޮޑު އަދަދެއް އިތުރުކޮށްފައިވެ އެވެ. މި ހިސާބުތަށް ރާއްޖޭގެ އެތެރޭގެ ދަރަންޏަށްވުރެ ބޭރުގެ ދަރަނި ކުޑަ ކަމަށް ދެއްކިނަމަވެސް އެތެރޭގެ ދަރަނީގެ ބޮޑު ބައެއްވެސް ހިއްސާ ކުރަނީ ބޭރުގެ ފަރާތްތަކުންނެވެ. ސަބަބަކީ އެތެރޭގެ ދަރަނީގެ ބޮޑު ބައެއް ޓީ ބިލް ހިމަނާފައިވުމެވެ. ޓީބިލްގެ ސަބަބުން ތިންވަނަ ކުއާޓަރާ ހަމައަށް ބަލާނަމަ އެކްސްޓާނަލް ބޮންޑްހޯލްޑާގެ އައުޓްސްޓޭންޓިން ހަތް ބިލިއަން ރުފިޔާއަށް ވުރެ މަތިވެފައިވާ ކަމަށް ދައްކަ އެވެ. 

މި އަހަރުގެ މިހާތަނަށް ބަލާއިރު ރާއްޖޭގެ ލޯނުތަކުގެ ޖުމްލަ އަދަދު އުޅެނީ 113 ބިލިއަން ރުފިޔާގަ އެވެ. އަދި ސަރުކާރު ކުންފުނިތަކުގެ ދަރަނި ހިމަނައިގެން ބަލައިފިނަމަ މި ދަރަނި 130 ބިލިއަން ރުފިޔާ ފަހަނަ އަޅާދެ އެވެ.