އަމީނީ މަގުގެ މަސައްކަތް މުއްތޮލިބު ބައްލަވައިފި

އަމީނީ މަގުގައި ނުނިމި ބާކީ އޮތް ބައިގެ މަސައްކަތް ހިނގާ ގޮތް ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތޮލިބް ބައްލަވާލައްވައިފި އެވެ.

މިއަދު ވަނީ އަމީނީ މަގުގައި މަސައްކަތް ހިނގަމުންދާ ސަރަހައްދަށް ވަޑައިގެން މަސައްކަތް ހިނގާ ގޮތް ބައްލަވާ މައުލޫމާތު އޮޅުން ފިލުއްވަވާފަ އެވެ. މިިނިސްޓަރާއެކު އެ ސައިޓަށް އެ މިނިސްޓްރީގެ އެހެން ވެރިން ވެސް ވަޑައިގަތެވެ. 

ކުރީ ސަރުކާރުން ހަދަން ފަށާއި ނިންމާ ނުލެވި އޮތް އަމީނީ މަގުގެ މަސައްކަތް ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ) އިން ފެށީ މި މަހުގެ ނުވަ ވަނަ ދުވަހު އެވެ. 

ކުރީ ސަރުކާރު ނިމުނުއިރު އަމީނީ މަގުން ހަދާފައި ވަނީ ހައުސިން މިނިސްޓްރީއާ ހަމައަށެވެ. އެ މަގުން ނުނިމި އޮތީ މަގުގެ ސެގްމެންޓް 12 އަދި 13 އެވެ. ރައީސް ޑރ. މުހައްމަދު މުއިއްޒުގެ ސަރުކާރުން ފެށީ އެ ދެ ސެގްމެންޓްގެ މަސައްކަތެވެ. 

އަމީނީމަގު ހެދުމުގެ މަސައްކަތް ކުރިއަށް ގެންދަނީ ޖުމްލަ 13 ސެގްމަންޓަކަށް ބަހާލައިގެންނެވެ. އެ މަޝްރޫއުގައި 1.79 ކިލޯމީޓަރުގެ މަގު ހެދުން ހިމެނެ އެވެ. މި މަސައްކަތް ސަރުކާރުން ރޯޑް ޑިވެލޮޕްމަންޓް ކޯޕަރޭޝަނާ ހާވާލު ކުރީ 84.4 މިލިޔަން ރުފިޔާ އަށެވެ. ކުރީގެ ރައީސް ސޯލިހްގެ ވެރިކަމުގައި ފެށި އެ މަސައްކަތް ސަރުކާރު ނިމުނު އިރު ވެސް ނުނިންމުނެވެ.