ޖޭއެސްސީން ހޯދަނީ 27 އިސް މެޖިސްޓްރޭޓަކާއި ދެ މެޖިސްޓްރޭޓެކެވެ. ކުރިމަތިލުމުގެ ފުރުސަތު މި މަހުގެ 31 ވަނަ ދުވަހަށް ދެ އެވެ.
އަތޮޅުތަކުގެ ގިނަ އަަދަދެއްގެ މެޖިސްޓްރޭޓް ކޯޓުތަކަށް މެޖިސްޓްރޭޓުންނާއި އިސް މެޖިސްޓްރޭޓުން ހޯދަން އިއުލާނު ކޮށްފި އެވެ.
ޖުޑީޝަލް ސާވިސް ކޮމިޝަން (ޖޭއެސްސީ) ގެ އިއުލާނުގައިވާ ގޮތުން އެ ކޮމިޝަނުން ހޯދަމުން ދަނީ ދެ މެޖިސްޓްރޭޓަކާއި، 27 އިސް މެޖިސްޓްރޭޓެކެވެ.
ޖޭއެސްސީގެ އިއުލާނުގައި ފަނޑިޔާރު ކަމަށް އެދި ކުރިމަތިލުމުގެ ފުރުސަތު މި މަހުގެ 31 ވަނަ ދުވަހުގެ 12:00 އާ ހަމައަށް ހުޅުވާލާފައިވާ ކަމަށް ބުނެފައިވެ އެވެ.
ޖޭއެސްސީ އިން ފަނޑިޔާރުކަމަށް ކުރިމަތިލުމަށް ހުޅުވާލާފައިވާއިރު، މި މަގާމުތަކުގެ ތެރެއިން އިސް މެޖިސްޓްރޭޓަކަށް މުސާރަ އާއި އިނާޔަތްތަކާއެކު މަހަކު 25،600ރ. ލިބޭއިރު މެޖިސްޓްރޭޓަކަށް މަހަކު 23،450ރ. ލިބެ އެވެ. މީގެ އިތުރުން ރައްޔިތުންގެ މަޖިލީހުން ކަނޑައަޅާ ގޮތެއްގެ މަތިން މެޑިކަލް އިންޝުއަރެންސް ލިބޭނެ އެވެ.