ރައީސްގެ ވައުދާ ހިލާފަށް ފެނަކަ މުވައްޒަފުން ކަނޑާތީ ކުއްލި މައްސަލައެއް

ސިޔާސީ ނޫން ވަޒީފާތަކުގައި ތިއްބެވި މުވައްޒަފުން ވަކި ނުކުރާނެ ކަމަށް ރައީސް ޑރ. މުހައްމަދު މުއިއްޒު ވެވަޑައިގެންފައިވާ ވައުދުފުޅާ ހިލާފަށް ފެނަކައިން މުވައްޒަފުން ވަކިކުރަމުން ދާތީ މަޖިލީހަށް އިދިކޮޅު އެމްޑީޕީގެ ފަރާތުން ކުއްލި މައްސަލައެއް ހުށަހަޅައިފި އެވެ.

މި ކުއްލި މައްސަލަ މަޖިލީހަށް ހުށަހެޅުއްވީ ފުވައްމުލަކު މެދު ދާއިރާގެ މެންބަރު ހުސެއިން މުހައްމަދު ދީދީ އެވެ. އެ މައްސަލަ ބަލައިގަނެ މިހާރު ދަނީ ބަހުސް ކުރަމުންނެވެ.

މައްސަލަ ހުށަހަޅުއްވަމުން ހުސެއިން ވިދާޅުވީ ފެނަކައަކީ މުޅި ރާއްޖެއަށް މުޅި ރާއްޖެއަށް ފެނާ ކަރަންޓު ފޯރުކޮށްދޭ ކުންފުނި ކަމަށްވެފައި، އެތަނުގައި މަސައްކަތް ކުރަމުންދާ ހީވާގި މުވައްޒަފުން ބޭއިންސާފުން، ބަދަލުހިފުމުގެ ރޫހެއްގައި ވަޒީފާއިން ވަކިކުރަމުން ގެންދާތީ އެފަރާތްތަކުން އެމްޑީޕީގެ ޕާލިމަންޓް ގްރޫޕުގައި އެކަން ހުއްޓުވައި ދިނުމަށް އެދިފައިވާ ކަމަށެވެ. 

އެހެންކަމުން މި މައްސަލަ ހުށަހެޅީ މިހާރުން މިހާރަށް އެކަން ހުއްޓުވުމަށް ގޮވާލައި، އެކަން ސަރުކާރުގެ ސަމާލު ކަމަށް ގެނައުމަށް ކަމަށް ހުސެއިން ވިދާޅުވި އެވެ.

"އެބޭފުޅުން ކުރައްވަން މިއުޅޭ މަސައްކަތަކީ، ކުރިއަށް އޮތް މަޖިލީސް އިންތިހާބުގައި، އެބޭފުޅުންގެ މީހުން ވަޒީފާއަށް ލުމަށްޓަކާ، އެމްޑީޕީއަށް އެބޭފުޅުންނަށް ނިސްބަތްވާ ކަމަށް ހީވާ މީހެއް ވިޔަސް ވަކިކުރަމުން މި ގެންދަނީ. މީ ވަރަށް ދެރަ ކަމެއް. ކޮންމެ ފަހަރަކު ސަރުކާރެއް ބަދަލުވެގެން ދާއިރު ތަންތަނުގަ ތިބޭ މުވައްޒަފުންނަށް މިގޮތަށް އަނިޔާ ކުރާކަށް ނުވާނެ،" މި މައްސަލައަށް ބަހުސް ކުރައްވަމުން ހުސެއިން ވިދާޅުވި އެވެ.

ހުސެއިން ވިދާޅުވީ، ހަރަދު ކުޑަ ކުރަން ނުވަތަ ކުންފުންޏަށް ފައިސާ ހުރި ކަމަކަށްވުރެ ބޮޑަށް އެކަން ކުރަމުން އެދަނީ ސިޔާސީ މަސައްކަތެއްގެ ގޮތުގައި ކަމަށެވެ. 

"އެތިބެ އާދައިގެ މުވައްޒަފުންތައް ވަޒީފާއިން ވަކިނުކޮށް، އެ މުވައްޒަފުން ބޭނުންކޮށްގެން އެ ޕްރޮޖެކްޓްތައް ރަގަޅަށް ފުރިހަމަ ކުރުމަށް [ގޮވާލަން]. މިހާރު މި ސަރުކާރު މިއޮންނަނީ ނިދާފަ. އެއްވެސް ތަނަކު އެއްވެސް މަސައްކަތެއް ނުހިނގާ،" ހުސެއިން ވިދާޅުވި އެވެ.

ހުސެއިން ހުށަހެޅުއްވި ކުއްލި މައްސަލައިގެ ވަގުތު ހަމަވުމުން މެމްބަރުން ވަނީ ވަގުތު އިތުރު ކުރަން ވެސް ވޯޓު ދެއްވާފަ އެވެ.

އާންމު ރައްޔިތުންނަށް ދީފައި ހުރި ވަޒީފާތައް ސިޔާސީ ބޭނުމެއްގައި ނަމަވެސް އަތުނުލައްވާނެ ކަމަށް ރައީސް ވަނީ ރިޔާސީ އިންތިހާބުގެ ކެމްޕޭނު ތެރޭގައި ވައުދުވެވަޑައިގެންފަ އެވެ. ނަމަވެސް، އެންމެ ގިނަ ސިޔާސީ މުވައްޒަފުން ތިބީ ފެނަކައިގައި ކަމަށް މި ސަރުކާރުން ކުރިން ހާމަކޮށްފައިވެ އެވެ.