ބައެއް ވަޒީރުންނަށް ރުހުން ނުދޭން އެމްޑީޕީން މަޝްވަރާ ފަށައިފި

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ކެބިނެޓް ގައި ހިމެނިވަޑައިގަންނަވާ ބައެއް މިނިސްޓަރުންނަށް ރުހުން ނުދޭން މެޖޯރިޓީ ޕާޓީ -- އެމްޑީޕީން މިރޭ މަޝްވަރާ ފަށައިފި އެވެ.

ގާނޫނުއަސާސީގެ 129 ވަނަ މާއްދާގެ (ހ) ގެ ދަށުން ވަޒީރުންގެ މަޖިލީހުގެ މެންބަރުންގެ ގޮތުގައި ޢައްޔަން ކޮށްފައިވާ 22 ބޭފުޅުންގެ ނަން، ގާނޫނުއަސާސީގެ 129 ވަނަ މާއްދާގެ (ރ) ގައިވާ ގޮތުގެމަތިން މަޖިލީހުގެ ރުހުން ހޯދުމަށްޓަކައި އިއްޔެ ވަނީ މަޖިލީހަށް ފޮނުވާފައެވެ.

މަޖިލީހުގެ 55 މެންބަރުން ނިސްބަތްވާ އެމްޑީޕީން ރޭ ބޭއްވި ބައްދަލްވުމުގައި ނިންމާފައިވަނީ ހުރިހާ ވަޒީރުންނަށް ރުހުން ދިނުމަށެވެ. ނަމަވެސް ބައެއް ވަޒީރުން ދައްކަވާ ވާހަކަތަކާއި ގެންގުޅުއްވާ ސިޔާސަތު ތަކުުގެ ސަބަބުން އެމްޑީޕީގެ ރޫހު މިހާރު އޮތީ ބައެއް ވަޒީރުންނަށް ރުހުން ނުދިނުމަށެވެ.

އެ މަަޝްވަރާ މިރޭ ވަނީ ފަށާފައެވެ. އެކަން އެމްޑީޕީގެ ޕީޖީ ގުރޫޕްގެ ބައެއް މެންބަރުން ވަނީ ޔަގީން ކޮށްދީފައެވެ. 

އެންމެ ގިނަ މެންބަރުންގެ ރޫހު ހުރީ މިނިސްޓަރު އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ އަލީ އިހްސާނާއި، މިނިސްޓަރު އޮފް އިސްލާމިކް އެފެއާޒް، ޑޮކްޓަރު މުހައްމަދު ޝަހީމް އަލީ ސައީދާއި މިނިސްޓަރު އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް، މުހައްމަދު ސައީދާއި މިނިސްޓަރު އޮފް ހައުސިން ލޭންޑް އެންޑް އާބަން ޑިވެލޮޕްމަންޓް ޑޮކްޓަރު އަލީ ހައިދަރު އަހްމަދަށް ރުހުން ނުދިނުމަށެވެ.

ހައިދަރަށް ރުހުން ދޭން މެންބަރުން ދެކޮޅު ހަދަނީ ކުރީ ސަރުކާރުން ނިންމި ލިސްޓަށް ފްލެޓާއި ގޯތި ނުދޭން ނިންމާފައިވާތީ އެވެ. ޝަހީމަށް ރުހުން ދޭން މެންބަރުން ދެކޮޅު ހަދަނީ ހައްޖު ކޯޓާއި ދިނުމުގައި އަމަލު ކުރަން ނިންމާފައިވާ ގޮތުންނެވެ. އިހްސާނާއި ސައީދާ މެދު ގިނަ ޝަކުވާތަކެއް މެންބަރުން ފާޅުކޮށްފައިވެ އެވެ.

އެމްޑީޕީގެ 55 މެންބަރުން ދެކޮޅު ހަދައިފިނަމަ އެެއްވެސް ވަޒީރަކަށް ރުހުން ނުލިބޭނެ އެވެ. ނަމަވެސް މެންބަރުންގެ ރޫހު ހުރީ ގިނަ ވަޒީރުންނަށް ރުހުން ދިނުމެވެ.

ރައީސް ޑރ. މުއިއްޒުގެ ސަރުކާރުގައި ބައެއް އާ މިނިސްޓްރީތަކާއި އަދި ކުރިން ހުރި މިނިސްޓްރީތަކުގެ މެންޑޭޓަށް ބޮޑެތި ބަދަލުތަކެއް ގެންނަވާފައިވެ އެވެ.