އެމްއެންޔޫ އިން ގްލޯބަލް ކޮލިޓީ އެކްރެޑިޓޭޝަން ހާސިލްކޮށްފި

ދުނިޔޭގެ ފެންވަރުގައި މަތީ ތައުލީމުގެ ކޮލިޓީ ކަށަވަރުކުރާ އިނގިރޭސިވިލާތުގެ މިނިވަން އިދާރާއެއް ކަމަށްވާ ކޮލިޓީ އެޝުއަރެންސް އެޖެންސީ ފޯ ހަޔާ އެޑިއުކޭޝަން (ކިއުއޭއޭ) އިން ދޭ ގްލޯބަލް އެކްރެޑިޓޭޝަން ދިވެހި ރާއްޖޭގެ ގައުމީ ޔުނިވަސިޓީން ހާސިލްކޮށްފި އެވެ.

އެމްއެންޔޫ އިން ބުނީ މި ގްލޯބަލް ކޮލިޓީ އެކްރެޑިޓޭޝަނަކީ އިނގިރޭސިވިލާތުގެ ކޮލިޓީ އެޝުއަރެންސް އެޖެންސީން ހިންގާ "އިންޓަނޭޝަނަލް ކޮލިޓީ ރިވިއު" އެއް ކަމަށެވެ.

މިކަމާ ގުޅިގެން މައުލޫމާތު ދިނުމަށް އެމްއެންޔޫ އިން ބޭއްވި ނޫސްވެރިންގެ ބައްދަލުވުމުގައި އެމްއެންޔޫގެ ވައިސް ޗާންސެލާ ޑރ. މުހައްމަދު ޝަރީފް ވިދާޅުވީ ހާސިލްކުރެވުނު ޝަފަކީ ޔުނިވާސިޓީގެ އިލްމީ ފެންވަރާއި، ދުނިޔޭގެ މިންގަނޑުތަކަަށް އެ ޔުނިވާސިޓީ އިން އަހަންމިއްޔަތުކަން ދޭ މިންވަރު ދައްކުވައިދޭ ކަމެއް ކަމަށެވެ. 

އޭނާ ވިދާޅުވީ ދެ އަހަރު ދުވަހުގެ މުއްދަތަށް ކުރިއަށް ގެންދިޔަ މި ރިވިއުގެ މަރުހަލާތަކުގައި ހުރިހާ ގޮތަކުން ވެސް ޔުނިވާސިޓީގެ ފެންވަރު ރަގަޅު ކަން ފާހަގަވެފައިވާ ކަމަށެވެ. އެގޮތުން ތަން ހިންގުމުގެ ސިޔާސަތުތަކާއި، ކިޔަވައިދިނުމާއި އުނގަންނައިދިނުމުގެ އުސޫލުތަކާއި، ސްޓޫޑެންޓް ސަޕޯޓްއަށް އަމަލުކުރާ މެކޭނިޒަމްތަކާއި، ޔުނިވާސިޓީގެ އެތެރޭގެ ފެންވަރު ކަށަވަރުކުރުމުގެ އިންތިޒާމުތައް ރަގަޅު ކަން މި ރިވިއު އިން ފާހަގަވެފައިވާ ކަމަށް ވިދާޅުވި އެވެ.

އެމްއެންޔޫއިން ހާސިލް ކުރި މި އެކްރެޑިޓޭޝަނަކީ ފަސް އަހަރުގެ މުއްދަތަކަށް ސައްހަ އެއްޗެކެވެ. އަދި، މިއީ އައިކިއުއާރުގެ މިންގަނޑުތައް ކާމިޔާބުކަމާއެކު ފުރިހަމަ ކުރާ ބައިނަލްއަގްވާމީ މުއައްސަސާތަކަކަށް ދޭ އެކްރެޑިޓޭޝަނެއް ކަމަންވެސް އެ އެމްއެންޔޫ އިން ބުންޏެވެ. މި އެކްރެޑިޓޭޝަނާއެކު އެމްއެންޔޫއަކީ ކިއުއޭއޭ ކޮމިއުނިޓީގެ ބައިނަލްއަގްވާމީ މެމްބަރެކެވެ.