އީދު ފާހަގަކުރަން ބަޖެޓު ދީފައިވަނީ ހޯމް މިނިސްޓްރީއަށެވެ. ޑރ. މުއިއްޒު ވަނީ އީދު ފާހަގަ ކުރުން ދައުލަތުގެ ކެރިފޯރުންތެރިކަން ހުރި މިންވަރުން ކުރިއަށް ގެންދަވާނެ ކަމަށް ވިދާޅުވެފަ އެވެ.
އިންތިހާބީ ރައީސް ޑރ. މުހައްމަދު މުއިއްޒު ވަނީ ނިމިދިޔަ އިންތިހާބުގެ ކެމްޕޭންގައި އިސްލާމީ ސަގާފަތް ދިރުވުމުގެ ގޮތުން ސަރުކާރުން ހޭދަކޮށްގެން މުޅިރާއްޖޭގައި އީދު ފާހަގަ ކުރައްވާނެ ކަމަށް ވިދާޅުވެފަ އެވެ. މި ވައުދު ފުއްދުމަށް އަންނަ އަހަރުގެ ބަޖެޓަށް 50 މިލިއަން ރުފިޔާ ހިމަނައިފި އެވެ.
މި އަހަރުގެ ރިޔާސީ އިންތިހާބުގެ ކާމިޔާބު ފާހަގަ ކުރައްވަމުން ސޯޝަލް ސެންޓަރުގައި ވާހަކަ ދައްވަމުން އިންތިހާބީ ރައިސް ޑރ. މުއިއްޒު ވިދާޅުވެފައިވާ ގޮތުގައި ރާއްޖޭގެެ ސިޓީތަކާއި ބޮޑެތި ރަށްތަކުގައި ކުލަ ގަދަކޮށް އީދު ފާހަގަކުރަން މަސައްކަތް ކުރައްވާނެ އެވެ. މި ވައުދު ފުއްދުމުގެ ގޮތުން އަންނަ އަހަރަށް ލަފާކޮށް ރައްޔިތުންގެ މަޖިލީހަށް އިއްޔެ ފޮނުވާފައިވާ ބަޖެޓުގައި ހޯމް މިނިސްޓްރީން އީދު ފާހަގަ ކުރަން 50 މިލިއަން ރުފިޔާ ހިމަނުއްވާފަ އެވެ.
އިންތިހާބީ ރައީސް ޑރ. މުއިއްޒު މާލެ ސިޓީގެ މޭޔަރުގެ މަގާމަށް ވަޑައިގެން މާލޭގައި ކުލަގަދަކޮށް އީދު ފާހަގަކުރެއްވި އެވެ. އަދި މާލެ ވަށައިގެން ޒަމާނީ ބޮލިދަނޑިތަކެއް ހަރުކުރައްވައި ކޮންމެ އީދެއްގައި ތަކުބީރު ރަށުތެރެއަށް އިވޭނެހެން ހެއްދެވި އެވެ.،