އިމިގްރޭޝަނާ ހަވާލު ކުރި ޗައިނާ މީހާ މާލެތެރަށް ގިނަކޮށްލައިފި

ވީއައިއޭގައި މީހުނަށް އުނދަގޫ ކޮށް، ތަންތަނަށް ކުޅު ޖަހައި ހަދަމުންދާ ކަމަށް ބުނެ ހައްޔަރަށް ނެގުމަށް ފަހު ފުލުސް އިދާރާއިން އިމިގްރޭޝަނާ ހަވާލު ކުރި ކަމަށް ބުނި ޗައިނާ އަންހެން މީހާ މާލެ ތެރެއަށް ގިނަ ކޮށްލައިފި އެވެ. -- އެ އަންހެން މީހާ ވަންނާނެ ތަނެއް ނެތެވެ؛ އޭނާ ކޭމްޕަކަށް ހަދާފައި ވަނީ މާފަންނު ފުލުހެވެ. 

އޭނާ ނަގާފައި ވަނީ އެގޮތަށް ވީއައިއޭގެ ތެރޭގައި އުޅޭތާ ހަފުތާތަކެއް ވެސް ވީފަހުންނެވެ. އެހައި ގިނަ ދުވަހު އޭނާ އެއާޕޯޓް ތެރޭގައި އުޅުނީ ވިސާގެ މައްސަލައެއް ކުރިމަތިވެ އޭނާއަށް ފުރޭނެ ގޮތް ނުވެގެނެވެ. 

އެކަމަކު އޭނާ ހައްޔަރަށް ނެގި އިރު މާލޭގައި ހުންނަ ޗައިނާ އެމްބަސީއިން އެމީހާ ފުރަން ޓިކެޓް ދީފައި އޮތެވެ. އޭނާ ހައްޔަރަށް ނެގުމަށް ފަހު އިމިގްރޭޝަނާ ހަވާލުކުރި ކަމަށް ރަސްމީ މީޑިއާގައި ފުލުސް އިދާރާއިން ބުންޏެވެ. 

އެނގިފައިވާ ގޮތުގައި މިގްރޭޝަނުން އެ މީހާއާ ހަވާލުވެފައި، އަންހެނުން ބައިތިއްބާ ޑިޓެންޝަނެއް ނުހުންނާތީ އަންހެން މީހާ އެތަނުގައި ފިރިހެނުންގެ ތެރޭގައި ނުބެހެއްޓޭނެ ކަމަށް ބުނެ މާލެތެރެއަށް ދޫކޮށްލީ އެވެ.

އަންހެން މީހާ މިހާރު ވަދެ ހުންނަނީ މާފަންނު ޕޮލިސް ސްޓޭޝަނުގަ އެވެ. އެ ސްޓޭޝަނުގައި ކޭމްޕް ޖަހައިގެން އޭނާ އުޅޭތާ ވެސް ހަދުވަސް ވެފައި ވެއެވެ. އޭނާ ކައިބޮއި ނިދައި އަދި ފާހާނާ ބޭނުން ކުރުން އޮންނީ ވެސް އެތާނގަ އެވެ. އަދި އޭނާ ބޭނުން ވުމުން ރަށުތެރެއަށް ނުކުމެފައި އަނެއްކާވެސް ގޮސް ފުލުސް އިދާރާއަށް ވަންނަނީ އެވެ.

"އެއީ އިމިގްރޭޝަނާ ހަވާލު ކޮށްފައިވާ މީހެއް، އިތުރު މައުލޫމާތު އިމިގްރޭޝަނުން ސާފު ކުރުން ރަނގަޅުވާނެ ކަމަށް ފެނޭ" ފުލުހުން މިއަދު އެ ހިދުމަތުގެ މިޑިއާ ވަޓްސްއެޕް ގްރޫޕަކަށް ފޮނުވި މެސެޖެއްގައި ލިޔެފައި ވެއެވެ.

ފުލުހުން އެހެން ބުނި ނަމަވެސް އިމިގްރޭޝަނުން މި އަންހެން މީހާގެ މައްސަލާގައި އެއްވެސް ވާހަކައެއް ނުދައްކަ އެވެ.