އިމްޕޯޓް ޑިއުޓީގެ ގޮތުގައި ދައުލަތަށް ނުދައްކާ އަދަދު 2021 ވަނަ އަހަރާ އަޅާބަލައިރު މިދިޔަ އަހަރު ވަނީ 34 ޕަސެންޓް އިތުރުވެފަ އެވެ.
މުދާ އެތެރެ ކުރި ނަމަވެސް ގިނަ އަދަދެއްގެ ފަރާތްތަކުން އިމްޕޯޓް ޑިއުޓީގެ ގޮތުގައި ދައުލަތަށް ދައްކަން ޖެހޭ ފައިސާއެއް ނުދައްކަ އެވެ. އޭގެ ސަބަބުން އިމްޕޯޓް ޑިއުޓީގެ ގޮތުގައި ދައުލަތަށް ލިބެން ޖެހޭ އާމްދަނީ އަހަރުން އަހަރަށް މަތިވަމުންދާ ކަމަށް ކަސްޓަމްސްގެ ހިސާބުތަކުން ދައްކަ އެވެ؛ މިހާރު އެ ނަމްބަރު ވަނީ 400 މިލިއަން ރުފިޔާއަށްވުރެ މަތިވެފަ އެވެ.
ފިނޭންސް މިނިސްޓްރީގެ ފިސްކަލް ހިރާސް ރިޕޯޓުގައިވާ ގޮތުން މިދިޔަ އަހަރުގެ ނިޔަލަށް އިމްޕޯޓް ޑިއުޓީގެ ގޮތުގައި ދައުލަތަށް ލިބެން ޖެހި ނަމަވެސް ނުލިބިވާ ފައިސާގެ އަދަދު ވަނީ 400 މިލިއަން ރުފިޔާއަށްވުރެ މައްޗަށް ޖެހިލާފަ އެވެ. މި އަދަދަކީ 2021 ވަނަ އަހަރާ އަޅާބަލާނަމަ 34 ޕަސެންޓުގެ އިތުރުވުމެކެވެ.
ފިނޭންސުން ބުނެފައިވާ ގޮތުގައި ރާއްޖޭގެ އިމްޕޯޓަރުން ގާނޫނާއި ގަވައިދަށް ތަބާވާ މިންވަރު މަތި ކުރުމުގެ ގޮތުން ކަސްޓަމްސް އިން ޕޯޓްސް ކްލިއަރެންސް އޮޑިޓްތައް ހަރުދަނާ ކުރުމުގެ މަސައްކަތް ކުރަމުން ގެންދެ އެވެ.
އެގޮތުން މިދިޔަ އަހަރު ނިމުނުއިރު ޓެކުހާ ގުޅޭ 246 މައްސަލައެއް ޓެކްސް ޓްރެބިއުނަލް ހިމެނޭހެން އެކި ކޯޓުތަކުގައި ހިންގަމުންދެ އެވެ. މީގެ އިތުރުން ޝަރުއީ ދާއިރާގެ ނިންމުންތަކާ އެއްގޮތަށް ގާނޫނުތަކާއި ގަވައިދުތަކަށް ގެންނަން ޖެހޭ ބަދަލުތައް އެދެވޭ އަވަސް މިނެއްގައި ގެނެވިފައި ނުވުން ހިމެނެ އެވެ.
ރާއްޖޭގައި މިހާރު ބޭނުން ކުރަމުންދާ ޖީއެސްޓީ ގާނޫނު އެކަށީގެންވާ ގޮތެއްގައި ތަންފީޒު ކުރުމަށްޓަކައި ގާނޫނަށް ގިނަ ބަދަލުތަކެއް ގެންނަން ޖެހޭކަން ބައިނަލްއަގުވާމީ ފަރާތްތައް ހިމެނޭހެން ކަމާ ގުޅޭ ގިނަ ފަރާތްތަކުން ދަނީ ފާހަގަ ކުރަމުންނެވެ.