ޓްރީ ޓޮޕްން އިހުމާލުވާ ކަމަށް ބުނާ މައްސަލަތައް ހެލްތުން ބަލަން ފަށައިފި

ރާއްޖޭގެ ޕްރައިވެޓް ހޮސްޕިޓަލް، ޓްރީ ޓޮޕްގައި ފަރުވާ ހޯދަން ދާ ބަލި މީހުނަށް އިހުމާލުވާ ކަމަށް ތުހުމަތުކުރާ ޝަކުވާތަކެއްގެ މައްސަލަ ހެލްތު މިނިސްޓްރީން ބަލަން ފަށައިފި އެވެ.  

ޓްރީޓޮޕަށް ތުހުމަތުތައް އޮތީ ރަނގަޅަށް ފަރުވާ ނުދޭ ކަމަށާއި ބަލި މީހުނާމެދު އަޅައި ނުލައި އިހުމާލުވާ ކަމަށެވެ. އެކަންކަން ފާހަގަކޮށް އެ ހޮސްޕިޓަލާ ދެކޮޅަށް ބަޔަކު ވަނީ މުޒާހަރާ ވެސް ކޮށްފަ އެވެ. 

މިދިއަ އާދިއްތަ ދުވަހު އެ މުޒާހަރާ ކުރީ އެ ހޮސްޕިޓަލުގައި ކެންސަރަށް ފަރުވާ ހޯދި މީހަކު އެ ހޮސްޕިޓަލުގެ އިހުމާލުން މަރުވި ކަމަށް ބުނެ އެވެ. -- އެ ހޮސްޕިޓަލްގެ އިހުމާލްތައް ކަމަށް ތުހުމަތުކޮށް އިތުރު މައްސަލަތައް ބޭރަށް ނެރެން ފެށީ އޭގެ ފަހުންނެވެ.

މި ތުހުމަތައް އޮވެ އަދި އެފަދަ ގިނަ ވާހަކަތައް ސޯޝަލް މީޑިއާގައި ދައުރު ކުރި ނަމަވެސް ހެލްތު މިނިސްޓްރީގެ ކޮލިޓީ އެޝުއަރެންސް ކޮމިޝަނަރު ތަސްލީމާ އުސްމާން ވިދާޅުވީ ޓްރީ ޓޮޕްން ބަލި މީހުނަށް އިހުމާލު ވެފައިވާ ކަމަށް ބުނެ އެއްވެސް މައްސަލައެއް ހުށަހަޅާފައި ނެތް ކަމަށެވެ. 

އެކަމަކު އެނާ ވިދާޅުވީ ހުޅުމާލޭގައި ހިންގާ އެ ހޮސްޕިޓަލަށް ތުހުމަތު ކުރާ ޕޯސްޓުތައް މިނިސްޓްރީއަށް ފާހަގަ ކުރެވި އެކަން ސަމާލުކަމަށް އައުމުން މައްސަލަ ބަލަން ފަށާފައިވާ ކަމަށެވެ. އަދި ޓްރީ ޓޮޕް ހޮސްޕިޓަލްގެ އިސްވެރިންނާއެކު ބައްދަލުވުމެއް ވެސް ބާއްވާފައިވާ ކަމަށެވެ.

ޓްރީޓޮޕް ހޮސްޕިޓަލަކީ ރާއްޖޭގައި އެންމެ މަތީ ފެންވަރުގެ ސިއްހީ ހިދުމަތް ދޭން މީގެ ފަސް އަހަރު ކުރިން ހުޅުވި ބޮޑު އަދި މަތީފެންވަރުގައި ތަރައްގީކޮށްފައިވާ ހޮސްޕިޓަލެކެވެ. އެ ހޮސްޕިޓަލް މިހާރު ހިންގަނީ އެ ހޮސްޕިޓަލް ހުޅުވި އިރު ގެންގުޅުނު ކޮންސެޕްޓްގައެއް ނޫނެވެ.