ޑިމޮކްރެޓްސްގެ ރައީސް ކަމަށް ހަސަން ވާދަ ކުރައްވަނީ

ދަ ޑިމޮކްރެޓްސްގެ ރައީސްގެ މަގާމަށް އެ ޕާޓީގެ މުއައްސިސް އަދި ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ކުރިމަތި ލައްވައިފި އެވެ.

ޑިމޮކްރެޓްސްގެ ރައީސްކަމަށް ކުރިމަތި ލެއްވިކަން އެޕާޓީގެ ވަގުތީ ޗެއާޕާސަންކަން ވެސް ކުރައްވާ ހަސަން އިއުލާނު ކުރެއްވީ އެކްސްގައި ޕޯސްޓެއް ހިއްސާ ކުރައްވަމުންނެވެ. އެ ޕޯސްޓްގައި ހަސަން އެދިވަޑައިގެންފައި ވަނީ ފޯކަސް ކުރުމަށާއި އުނދަގޫ ކަންކަމާއި ގޮންޖެހުންތަކާ ކުރިމަތިލުމަށް ރަނގަޅު ޓްރެކްގައި ތިބުމަށެވެ.

ދަ ޑިމޮކްރެޓްސްގެ އަސާސީ ގަވާއިދުގައިވާ ގޮތުގެމަތިން ޕާޓީގެ ދާއިމީ މަގާމުފުރާތައް ފުރާނެ މީހުން އިންތިހާބުކުރުމަށް  މަގާމުތަކަށް ކުރިމަތިލާން ހުޅުވާލާފައި ވަނީ މިދިޔަ އާދީއްތަ ދުވަހު އެވެ. އަންނަ މަހުގެ 15 ވަނަ ދުވަހުގެ ނިޔަލަށް އެ ފުރުސަތު ހުޅުވާލައިފައިވެ އެވެ.

މަގާމުތަކަށް ހުޅުވާލައިފައި ވަނީ "ފަށަލަ" ތަކަކަށް ބަހާލައިގެންނެވެ. އެގޮތުން ގައުމީ ފަށަލައިގައި ޕާޓީގެ ރައީސާއި އާންމު ނައިބު ރައީސްގެ އިތުރުން، ޕާޓީގެ އަންހެން ނައިބް ރައީސަކާއި، ޒުވާން ނައިބު ރައީސަކާއި، ވިމެން ޑިމޮކްރެޓްސް ލީޑަރާއި ނައިބާއި، ޔަންގް ޑިމޮކްރެޓްސް ލީޑަރާއި ނައިބު ހިމެނެ އެވެ.

އަދި، ވަކިވަކި އަތޮޅުތަކަށާއި ސިޓީތަކަށް ރައީސުންނާއި ނައިބުން އިންތިހާބުކުރަން ނިންމާފައިވެ އެވެ. އަދި ދާއިރާ ފަށަލައިން ދާއިރާ ރައީސަކު އިންތިހާބު ކުރުމަށް ވެސް ހަމަޖެހިފައިވެ އެވެ.

ހުޅުވާލައިފައިވާ މަގާމުތަކަށް ޑިމޮކްރެޓްސްގެ ގިނަ މެމްބަރުން ދަނީ ޝައުގުވެރިކަން ފާޅުކުރަމުންނެވެ. މިހާތަނަށް ރައީސް ކަމަށް ކުރިމަތިލައްވާފައި ވަނީ ހަސަން އެކަންޏެވެ.