ޔޫޒަބަލް ރިޒާވްގައި ދެ މަހުގެ ޒަރޫރީ މުދާ ގެންނަ ވަރަށް ފައިސާ

ރާއްޖޭގެ ޖުމްލަ ރިޒާވްގައި މިހާރު ފައިސާ ހުރި މިންވަރުން، ބޭނުން ކުރެވޭ ރިޒާވް ނުވަތަ ޔޫޒަބަލް ރިޒާވްގައި މިހާރު ހުރީ ދެ މަހުގެ އިމްޕޯޓަށް ބޭނުންވާ ވަރުގެ ފައިސާ އެވެ. 

މޯލްޑިވްސް މަނިޓަރީ އޮތޯރިޓީގެ ސެޕްޓެމްބަރު މަހުގެ އިކޮނޮމިކް އަޕްޑޭޓް ކަރުދާސް ދައްކާ ގޮތުގައި މިދިއަ އޯގަސްޓް މަސް ނިމުނުއިރު ރާއްޖޭގެ ޖުމްލަ ރިޒާވްގައި ހުރީ 694 މިލިއަން ޑޮލަރެވެ. މި އަދަދަކީ ޖުލައި މަސް ނިމުނުއިރު ރިޒާވްގައި ހުރި 594 މިލިއަން ޑޮލަރަށްވުރެ 100 މިލިއަން ޑޮލަރު އިތުރު ވުމެކެވެ. 

ނަމަވެސް މިހާރު ރިޒާވްގެ ޓްރެންޑް ދައްކާ ގޮތުގައި ދަނީ ދަށްވަމުންނެވެ. ޖޫންގައި 748 މިލިއަން ޑޮލަރު ހުރި ނަމަވެސް ޖުލައިގައި މި އަދަދު ވަނީ 702 މިލިއަން ޑޮލަރަށް ވެއްޓިފަ އެވެ. 

އޯގަސްޓް މަސް ނިމުނުއިރު ރާއްޖޭގެ ޖުމްލަ ރިޒާވްގައި ހުރި 694 މިލިއަން ޑޮލަރުން ބަލާނަމަ މިހާރު ރާއްޖޭގެ ޔޫޒަބަލް ރިޒާވްގައި ހުންނާނީ ގާތްގަނޑަކަށް 150 މިލިއަން ޑޮލަރެވެ. މި އަދަދަކީ ރާއްޖޭގެ ދެ މަހުގެ އިމްޕޯޓަށް ކިރިޔާ ފުދޭވަރުގެ ފައިސާ އެވެ. 

ރާއްޖެއަށް ކޮންމެހެން ބޭނުންވާ ތަކެތި އިތުރު ކުރަން މަހެއްގެ މައްޗަށް އެވްރެޖުކޮށް 60 މިލިއަން ޑޮލަރު ވަރު ހަރަދުވެ އެވެ.

އެންމެފަހުގެ ހިސާބުތައް ދައްކާ ގޮތުގައި ލޯނު ދައްކަން 1,413.5 ބިލިއަން ރުފިޔާ ވަނީ ހަރަދުކޮށްފަ އެވެ. މި އަހަރު ލޯނު ދައްކަން ކަނޑައަޅާފައިވާ ބަޖެޓަކީ 2,040.4 ބިލިއަން ރުފިޔާ އެވެ. މި ފަހުގެ ތާރީހުގައި ރާއްޖޭގެ ރިޒާވް އިތުރު ވެގެން ދިޔައީ 2021 ވަނަ އަހަރުގެ ސެޕްޓެމްބަރު މަހު އެވެ. ރިޒާވްގެ ނަމްބަރު އެއް ބިލިއަން ޑޮލަރަށް އެެރި އެވެ. ނަމަވެސް މި އަދަދަށް ރިޒާވް މަތިވެގެން ދިޔައީ އިންޑިއާގެ މަރުކަޒީ ބޭންކު ރިޒާވް ބޭންކް އޮފް އިންޑިއާ (އާރުބީއައި) އާއި ރާއްޖޭގެ އެމްއެމްއޭއިން ހެދި ކަރަންސީ ސްވޮޕް ނުވަތަ ފައިސާ ބަދަލު ކުރުމުގެ އެއްބަސްވުމުގެ ސަބަބުންނެވެ.