ދެވަނަ ބުރުގައި ރީ-ރަޖިސްޓަރީ ކުރަން 47،000 އަށްވުރެ ގިނަ ފޯމު

ރިޔާސީ އިންތިހާބުގައި ވޯޓުލުމަށް 47،000 އަށްވުރެ ގިނަ މީހުން ރީ-ރަޖިސްޓްރީ ކުރަން ފޯމު ހުށަހަޅާފައިވާ ކަމަށް އިލެކްޝަން ކޮމިޝަނުން ބުނެފި އެވެ.

އީސީ އިން މިއަދު ބުނެފައި ވަނީ އިންތިހާބުގެ ދެވަނަ ބުރަށް ރީ-ރަޖިސްޓްރީ ކުރަން ހުޅުވައިލި ތިން ދުވަހުގެ ތެރޭގައި އޮންލައިންކޮށާއި، އީސީގެ ކައުންޓަރުތަކަށް އަދި އަތޮޅުތަކުގެ ފޯކަލްޕޮއިންޓްތައް މެދުވެރިކޮށް 47،000 އަށްވުރެ ގިނަ ފޯމު ހުށަހަޅާފައިވާ ކަމަށެވެ.

އޭގެތެރެއިން؛

އީސީގެ ނައިބު ރައީސް އިސްމާއިލް ހަބީބް މިއަދު ވިދާޅުވެފައި ވަނީ ރީ-ރަޖިސްޓަރީ ކުރަން އެންމެ ގިނަ ފޯމު ހުށަހަޅާފައިވަނީ ދެ ކެންޑިޑޭޓުން ނިސްބަތްވާ ދެ ޕާޓީން ކަމަށެވެ. އެއީ އެމްޑީޕީއާއި ޕީޕީއެމް އެވެ.

އޮންލައިންކޮށް ރީ-ރަޖިސްޓްރީ ކުރަން ހުށަހަޅާފައިވާ ބައެއް މީހުން ހުށަހެޅި ފޯމުތައް ޕެންޑިންގައި އިންނާތީ، އަލުން ފިޒިކަލް ފޯމު ހުށަހަޅާފައިވާ ކަމަށް ވެސް ހަބީބް ވިދާޅުވި އެވެ.

"[ފޯމުތަކުގެ] ސައްހަކަން ކަށަވަރުވިހާ އަވަހަކަށް ރީ-ރަޖިސްޓަރީ ކުރި އެންމެންގެ ލިސްޓު އިލެކްޝަންސް ކޮމިޝަނުން ޝަކުވާއަށް ހުޅުވާލާނެ. އަދި އެ ލިސްޓު ސަރުކާރުގެ ގެޒެޓްގައި ޝާއިއުކޮށް، އިލެކްޝަންސް ކޮމިޝަންގެ ވެބްސައިޓުގައި އާންމުކުރުމުގެ އިތުރުން، ކެންޑިޑޭޓުންނާއި ކެންޑިޑޭޓުން ނިސްބަތްވާ ޕާޓީތަކާ ހިއްސާ ކުރާނެ،" ހަބީބް ވިދާޅުވި އެވެ.

ރިޔާސީ އިންތިހާބުގެ ފުރަތަމަ ބުރުގައި ވޯޓްލާން ރީ-ރަޖިސްޓާ ކޮށްފައި ވަނީ 42،867 މީހުންނެވެ. އެފަހަރު ވޯޓުލާފައި ވަނީ ވޯޓުލުމުގެ ހައްގު ލިބިގެންވާ މީހުން 79 ޕަސެންޓް މީހުންނެވެ. ދެވަނަ ބުރުގެ ރީ-ރަޖިސްޓްރޭޝަނަށް ހުޅުވާލުމުން ޕާޓީތަކުން ވަނީ ފޯމު ފުރައިދީފަ އެވެ. ޕާޓީތަކުން ބަލްކުކޮށް ހުށަހަޅާ ފޯމުތަކުގެ ސައްހަކަން ކަށަވަރުކުރަން ވަކިވަކި މީހުންނަށް ގުޅަމުންދާނެ ކަމަށް އީސީން ބުންޏެވެ. އީސީން އެހެން ބުނެފައި ވަނިކޮށް ވަގު ފޯމު އަޅާ ކަމުގެ ތުހުމަތުތައް އިދިކޮޅު ޕީޕީއެމް އިން ދަނީ ކުރަމުންނެވެ.