ކަންނެލީގެ އަގު މަތި ނުކޮށްގެން ރުޅިގަދަވެއްޖެ

ކަޅުބިލަ މަހުގެ އަގު މިއަދުން ފެށިގެން ބޮޑު ކުރި ނަމަވެސް ކަންނެލީގެ އަގަށް އެއްވެސް ބަދަލެއް ނުގެންނާތީ މަސްވެރިން ޝަކުވާ ކުރަން ފަށައިފި އެވެ. 

ކަންނެލި މަސްވެރިންގެ ޖަމިއްޔާ، ބޮޑު ކަންނެލި މަސްވެރިންގެ ޔޫނިއަން އިން ބުނި ގޮތުގައި އީޔޫ އަދި ޔޫކޭ އަށް މަހުގެ ޑިއުޓީ ކަނޑާލުމުން ބޮޑު ކަންނެލި ގަންނަ އަގު ބޮޑު ކުރެވޭނެ ކަމަށް އަބަދު ވެސް ބުނަމުންދިޔަ ކަމަށެވެ. ނަމަވެސް ކަނޑުމަސް ގަންނަ އަގު ކިލޯއަކުން އަށް ރުފިޔާ ބޮޑުކުރިއިރު ކަންނެލި މަސްވެރިންނަށް އޮތީ ކޮން ގޮތެއް ތޯ އެ ޖަމިއްޔާ އިން ވަނީ ސުވާލު އުފައްދާފަ އެވެ. 

ބޮޑު ކަންނެލި ޔޫނިއަން އިން ވަނީ މި އަހަރުގެ ރިޔާސީ އިންތިހާބަށް ކުރިމަތިލި ކެނޑިޑޭޓުންނަށް ހާއްސަކޮށް ހުށަހެޅުން ތަކެއް ވެސް ހުށަހަޅާފަ އެވެ. މީގެތެރޭގައި އެމީހުންނަށް ދޭ ފައިސާ ޑޮލަރުން ދިނުން ހިމެނެ އެވެ. 

އިންތިހާބުގެ ދެވަނަ ބުރުގެ ވޯޓުލާން ދެ ހަފުތާއަށް ކުޑަތަންވެފައިވަނިކޮށް ސަރުކާރުން ރޭވަނީ އީޔޫއިން ނަގާ ޑިއުޓީ ކުޑަކުރަން އުޅޭ ކަމުގެ ފެހި ސިގްނަލް ލިބިފައިވާ ކަމަށް ބުނެ ކަނޑު މަސް ކިލޯއެއްގެ އަގު 17ރ. އިން 25ރ. އަށް ބޮޑުކޮށްފަ އެވެ. 

ސަރުކާރުގެ މަސް ކުންފުނި މިފްކޯއިން މިފްކޯ އިން ރޭ ބުނި ގޮތުގައި މި ބަދަލު ގެންނަން ނިންމީ ޔޫރަޕަށް އެކްސްޕޯޓް ކުރާ މަހުން ނަގާ ޑިއުޓީ ކަނޑާލަން ނިންމާފައިވާ ކަން ސަރުކާރަށް ޔަގީން ކުރެވުމާއި ގުޅިގެންނެވެ. މަހަަށް ހަމަ އަގު ހޯދާ ދިނުމަށް ޔޫރަޕަށް ބޭކުރާ މަހުން ނަގާ ޑިއުޓީ ކަނޑާލަން ސަރުކާރުން ދިޔައީ ކެނޑިނޭޅި މަސައްކަތް ކުރަމުންނެވެ. އެކި ލެވެލްގައި ސަރުކާރުން ވަނީ އެކަމުގެ މަޝްވަރާތައް ކުރި އަށް ގެންގޮސްފައިވާ ކަމަށްވެސް ބުނެފައިވެ އެވެ. 

ކަންނެލި މަސްވެރިންގެ ހުށަހެޅުން - ޑޮލަރުން ފައިސާ ދިނުން ހިމަނާއި ކަންނެލި މަސްވެރިންގެ 13 ޑިމާންޑެއް