އަނަސްގެ މަރަށް ހަތް އަހަރު؛ 15 މިނެޓަށް މީދޫ އަނދިރިކޮށްލަނީ

ލިޓަސް ސާވިސް ސެންޓަރު ތެރޭގައި އަނިޔާވެރިކޮށް ރ. މީދޫ، ފެންފިޔާޒުގޭ، މުހައްމަދު އަނަސްގެ މަރަށް ހަތް އަހަރު ފުރުމާއި ދިމާކޮށް އެ ރަށް އަނދިރިކޮށްލަން ކައުންސިލުން ނިންމައިފި އެވެ.

މީދޫ ކައުންސިލުން ބުނީ އަނަސްގެ އަނިޔާވެރި މަރަށް މިއަދު ހަތް އަހަރުފުރޭއިރު މިއީ މުޅި މީދޫއަށް ކަޅު ދުވަހެއް ކަމަށެވެ. މީދޫ ރައްޔިތުން ތިބީ އެ އަނިޔާވެރި މަރަށް އިންސާފަށް އެދިއެދި ކަމަށް ވެސް ބުންޏެވެ.

ޖުލައި 31، 2017 ވަނަ ދުވަހުގެ ރޭ އެ އަނިޔާވެރި ގަތުލު ހިނގާދިޔަ ވަގުތަކީ މުޅި މީދޫގެ ރައްޔިތުންނަށް އަނދިރި ވަގުތެއް ކަމަށާ އެ އަނދިރި ވަގުތުގެ ހަނދާން އައުކުރުމުގެ ގޮތުން މިރޭ 9:15 އިން 9:30 އަށް މީދޫގެ ހުރިހާ މަގުބައްތިތަކެއް ނިއްވާލަން ހަމަޖެހިފައިވާ ކަމަށެވެ.

އެ ރަށު ކައުންސިލުން ވަނީ އެވަގުތުގައި އިންސާފަށް އެދި ސޯޝަލް މީޑިއާގައި ވީހާވެސް ގިނަ ބަޔަކު ޝުއޫރުފާޅުކޮށް ދިނުމަށް ވެސް އެދިފަ އެވެ.

އަނަސް މަރާލުމުގެ ތުހުމަތު އޮތް އެންމެން ދޫކޮށްލުމުން ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ. ސަރުކާރުން ވެސް ވަނީ ކަންބޮޑުވުން ފާޅުކޮށްފަ އެވެ.

އަނަސް މަރާލި މައްސަލައިގައި ކްރިމިނަލް ކޯޓުގައި ހަތް މީހެއްގެ މައްޗަށް ދައުވާ އުފުލި އެވެ. އެއީ ދަފްތަރު ނަމްބަރު 1746، ސިމާހު މޫސާ އާއި ސ. ފޭދޫ، ވެސްޓަންވިލާ، ހަސަން މަހްފޫޒް އާއި ތ. ކިނބިދޫ، ގުލްފާމުގެ، މުހައްމަދު ޝާޒް އާއި ލ. ގަން ތުނޑީ، ނަންނާރިގެ، ޖުނައިހު އަބްދުﷲ އާއި ޅ. ކުރެންދޫ އަސުރުމާގެ، އަހުމަދު ޒަޔާނުގެ އިތުރުން ގ. ލޮނުމިދިލިގެ، އަފްރާހު އަބްދުއްރައްޒާގު އަދި މ. ދިމިޝްގު، އުސްމާން ޝަރީފް އެވެ.

މި މައްސަލައިގައި ޒަޔާން، އުސްމާން އަދި އަފްރާހުގެ މައްޗަށް އުފުލާފައި ވަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ދައުވާ އެވެ. ދެން ތިބި މީހުންގެ މައްޗަށް އުފުލާފައި ވަނީ ގަސްދުގައި މީހަކު މަރާލުމުގައި ބައިވެރިވިކަމުގެ ދައުވާ އެވެ. މި އެންމެން ވެސް ވަނީ ދައުވާތަކަށް އިންކާރުކޮށްފަ އެވެ.

މި އެންމެންގެ މައްޗަށް ކުށް ސާބިތު ނުވާ ކަމަށް ކްރިމިނަލް ކޯޓުން ހުކުމް ކޮށްފައި ވަނީ މިދިޔަ ފެބްރުއަރީ މަހުގެ 25 ވަނަ ދުވަހު އެވެ. ކޯޓުން އެ ހުކުމް ކުރީ ކުށް ސާބިތު ކުރެވޭ މިންވަރަށް ހެކި ނެތް ކަމަށް ބުނެ އެވެ.

ހާދިސާ ހިނގި މަންޒަރު ދުށް ސިއްރު ހެކިންވެރިން މި މައްސަލައިގައި ހެކިބަސް ދީފައެއް ނުވެ އެވެ. ދެ ފަހަރު ދައުލަތަށް ފުރުސަތު ދިނުމުން ވެސް އެމީހުން ކޯޓަށް ހާޒިރުކުރެވިފައެއް ނުވެ އެވެ.